| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.32 | Dem. 43.34 (English) | >>Dem. 43.37 |
43.33ἐπειδὰν οὖν λέγῃ Μακάρτατος , ὅτι ἐνίκησεν ὁ πατὴρ αὐτοῦ Θεόπομπος τοῦ κλήρου τούτου , ὑπολαμβάνετε αὐτῷ ὑμεῖς , ὦ ἄνδρες δικασταί , ὅτι καὶ ἡ γυνὴ ἐνίκησεν πρότερον ἢ Θεόπομπος ὁ τουτουὶ πατήρ , καὶ ὅτι δικαίως ἐνίκησεν ἡ γυνὴ ἐκ τοῦ οἴκου οὖσα τοῦ Ἁγνίου , Εὐβουλίδου θυγάτηρ οὖσα , τοῦ ἀνεψιοῦ τοῦ Ἁγνίου , ὁ δὲ Θεόπομπος ὅτι οὐκ ἐνίκησεν , ἀλλὰ παρεκρούσατο , οὐκ ὢν ἐκ τοῦ οἴκου τὸ παράπαν τοῦ Ἁγνίου .
43.34ταῦτα αὐτῷ ὑμεῖς , ὦ ἄνδρες δικασταί , ὑπολαμβάνετε , καὶ ὅτι τὸν παῖδα τουτονὶ Εὐβουλίδην , τὸν Εὐβουλίδου υἱόν , Ἁγνίου δέ , οὗ ἐστιν ὁ κλῆρος , ἀνεψιοῦ παῖδα πρὸς πατρός , οὔτε Θεόπομπος ὁ Μακαρτάτου πατὴρ οὔτε ἄλλος οὐδεὶς πώποτε ἀνθρώπων ἐνίκησεν . νυνὶ δʼ ἐστὶν ὁ ἀγὼν καὶ ἡ διαδικασία περὶ τοῦ κλήρου τοῦ Ἁγνίου τῷ Εὐβουλίδου υἱεῖ τούτῳ καὶ Μακαρτάτῳ τουτῳὶ τῷ Θεοπόμπου υἱεῖ · καὶ ὁπότερος τούτων δικαιότερα λέγειν δόξει καὶ κατὰ τοὺς νόμους μᾶλλον , δῆλον ὅτι τούτῳ ὑμεῖς οἱ δικασταὶ προσθήσεσθε .
43.35ἀναγίγνωσκε τὰς μαρτυρίας τὰς ὑπολοίπους , πρῶτον μὲν ὅτι ἡ Φυλομάχη ἡ τοῦ Ἁγνίου τηθὶς ἀδελφὴ ἦν ὁμοπατρία καὶ ὁμομητρία τῷ Πολέμωνι τῷ Ἁγνίου πατρί · ἔπειτα τὰς ἄλλας ἁπάσας ἀναγνώσεται <τὰς > περὶ τοῦ γένους .
Μαρτυρίαι
μαρτυροῦσι δημόται εἶναι Φιλάγρῳ τῷ Εὐβουλίδου πατρὶ καὶ Πολέμωνι τῷ πατρὶ τῷ Ἁγνίου ,καὶ εἰδέναι Φυλομάχην τὴν μητέρα τὴν Εὐβουλίδου νομιζομένην ἀδελφὴν εἶναι Πολέμωνος τοῦ πατρὸς τοῦ Ἁγνίου ὁμοπατρίαν καὶ ὁμομητρίαν ,καὶ μηδενὸς πώποτʼ ἀκοῦσαι ὡς γένοιτο ἀδελφὸς Πολέμωνι τῷ Ἁγνίου .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.32 | Dem. 43.34 (English) | >>Dem. 43.37 |
